D'EIB ënnerstëtzt d'héich modern Fuerschung, Entwécklung an Innovatioun vun Artec 3D am Beräich vun den 3D-Scantechnologien.

• Lëtzebuergeschen 3D-Scanner-Entwéckler Artec3D kritt Venture-Kreditfinanzéierung vun der EIB fir seng Fuerschung, Entwécklung an Innovatioun fir Scantechnologië vun der nächster Generatioun virunzedreiwen
• D'Finanzéierung vun der EIB ënnerstëtzt d'Investitioune vun Artec 3D, déi an hire Fuerschungsinstallatiounen zu Lëtzebuerg an a Portugal gemaach ginn.
• D'Finanzéierung ass déi éischt vun der InvestEU-Initiativ vun der Europäescher Kommissioun ënnerstëtzte Risikokapitalfinanzéierung vun der EIB zu Lëtzebuerg.

D'Europäesch Investitiounsbank an den 3D-Scan-Entwéckler Artec 3D mat Sëtz zu Lëtzebuerg schléissen eng laangfristeg Partnerschaft of am Kader vun där 15 Milliounen Euro fir d'Ënnerstëtzung vun der Fuerschung an der Entwécklung an den éischten dräi Joer virgesi goufen. Der EIB hire Venture-Kredit erméiglecht et Artec 3D, hir 3D-Scantechnologien an Algorithmen vun der nächster Generatioun fir d'Veraarbechtung vun 3D-Daten virunzedreiwen an domat wichteg europäesch Technologie an Innovatioun ze ënnerstëtzen. D'Investitioune vun Artec 3D am Beräich vun der Entwécklung vun neie Produiten a Software, déi och d'Notzung vu KI ëmfaassen, ginn haaptsächlech zu Lëtzebuerg an deelweis a Portugal duerchgefouert. D'Finanzéierung vun der EIB gëtt vum InvestEU-Programm vun der Europäescher Kommissioun ënnerstëtzt.

De Finanzéierungsaccord vun der EIB gouf feierlech ënnerschriwwen op der Technologiemesse Nexus zu Lëtzebuerg, a Präsenz vum lëtzebuergesche Vizepremierminister Xavier Bettel, souwéi vun d’Anne Calteux, Chefin vun der Vertriedung vun der Europäescher Kommissioun zu Lëtzebuerg.

"Betriber wéi Artec 3D weisen, datt Lëtzebuerg eng staark Kraaft vun der europäescher Innovatioun ass," seet de Vizepresident vun der EIB Robert de Groot. "Innovativ Betriber wéi Artec 3D kënnen d'Finanzéierung kréien, déi se brauchen, fir direkt hei an Europa ze expandéieren. D'EIB bitt Finanzéierung fir datt wichteg Technologien an der EU bleiwen. Dofir sinn Initiative wéi InvestEU an eisen TechEU-Programm esou wichteg. Mir freeën eis, Artec 3D eise Venture-Kredit zur Verfügung ze stellen, fir dofir ze suergen, datt dës fortgeschratt Technologie an Europa ka wuessen."

D'Innovatioune vun Artec 3D dreiwen elo schonn d'digital Transformatioun a verschiddenen Infrastrukture virun, dorënner, d'Energie, den Transport, d'Loft- a Raumfaart, d'Gesondheetswiesen, d'kulturellt Ierwen, d'Educatioun an d'Verdeedegung weltwäit. Zu hiren intern entwéckelten Technologië gehéiere fortgeschratt 3D-Scanekipementer esouwéi d'Software, déi néideg ass fir digital Zwillinge vu reelle Géigestänn ze kreéieren. E wichtegen Differenzéierungsfaktor ass, datt d'Scannere vun Artec 3D portabel a villsäiteg sinn an direkt an hir eegen Dateveraarbechtungsoftware kënnen integréiert ginn. Dës Kombinatioun erlaabt et de Benotzer, Géigestänn vun alle Formen, Gréissten a Komplexitéiten an héichopléisend 3D-Modeller ëmzewandelen, wärend gläichzäiteg d'Zäit an den Opwand däitlech reduzéiert ginn.

"D'Zesummenaarbecht mat der Europäescher Investitiounsbank ass virun allem eng Unerkennung vun der Roll vun Artec 3D als Leader an der interdisziplinärer Fuerschung an Entwécklung, esouwuel an der KI wéi och an der Computervisioun an der europäescher High-Tech-Welt,” erkläert de CEO a Matgrënner vun Artec 3D Art Yukhin. "Zënter 18 Joer entwéckelt eis Ekipp vun Experten innovativ 3D-Technologien, déi nei Standarden am 3D-Scannen an der Erfaassung vun digitalen Zwillinge setzen. Mat der Ënnerstëtzung vun der EIB skaléiere mir eis Fuerschung an Entwécklung a beschleunegen d'Entwécklung vun industriefäege Léisunge vun der nächster Generatioun, déi d'technologesch Leaderpositioun vun Europa op der globaler Bün stäerken."

"D'Ënnerstëtzung vun der Europäescher Investitiounsbank fir d'innovativ Aarbecht vun Artec 3D iwwer den InvestEU-Programm ass eng gutt Neiegkeet fir Lëtzebuerg an Europa. D'Fërderung vun der europäescher Exzellenz an den 3D-Scantechnologien an d'Stäerkung vun der EU hirer Roll als technologesche Leader ass immens wichteg an enger Zäit, wou d'EU sech beméit, den Innovatiounsretard opzehuelen. Dës Ënnerstëtzung ermächtegt de Betrib direkt, d'Innovatioun an d'Schafung vun Aarbechtsplazen zu Lëtzebuerg an an der ganzer Unioun ze fërderen. Mir freeën eis op de positiven Impakt vun hire Fuerschungs- an Entwécklungsaktivitéiten," betount d'Anne Calteux, Direktesch vun der Vertriedung vun der EU-Kommissioun zu Lëtzebuerg.

Um techneschen Niveau ënnerstëtzt d'Finanzéierung d'Entwécklung vun den Héichpräzisiouns-3D-Scannere mat kuerzer Reechwäit an d'fortgeschratt 3D-Software vun Artec 3D, déi eng séier a präzis Datenerfaassung fir eng Rei vun Uwendungen erméiglechen. De Betrib war den éischten, deen "zilfräit" Scanne mat Handscanneren agefouert huet, wouduerch d'Datenerfassung vill méi séier a méi einfach gëtt wéi mat traditionelle Scanneren, déi op festem Ekipement a Referenzmarkere baséieren. D'Scanne vun Artec 3D gouf entwéckelt fir den ënnerschiddleche Bedierfnisser vun den Endbenotzer a villen Uwendunge gerecht ze ginn, vun der Personaliséierung vu Bijoue bis zur industrieller Produktioun. Et kann och hëllefen, d'kulturellt Ierwen ze erhalen, andeems et eng detailléiert Ënnersichung erméiglecht, ouni Risiko, datt d'fragil Artefakte beschiedegt ginn.

Hannergrondinformatiounen

D'Europäesch Investitiounsbank ass d'Institutioun vun der Europäescher Unioun, déi laangfristeg Kreditter bitt an hire Memberstaate gehéiert. Se finanzéiert Investitiounen, déi zu der EU hire politeschen Ziler bäidroen Der EIB hir Projete stäerken d'Kompetitivitéit, fërderen d'Innovatioun an d'nohalteg Entwécklung, stäerken d'sozial an territorial Kohäsioun, droen zu Fridden a Sécherheet bäi an ënnerstëtzen eng gerecht a séier Transitioun zur Klimaneutralitéit. Dem Grupp säin AAA-Rating erlaabt et him, zu gënschtege Konditiounen op de globale Mäert Kreditter opzehuelen, wouvunner seng Clienten an der Europäescher Unioun an doriwwer eraus profitéieren. De Grupp hält sech un déi héchst ekologesch, sozial a Gouvernance-Standarden an huet eng Tier-1-Kapitalquot vun 32 %.

Den InvestEU-Programm stellt der Europäescher Unioun eng wichteg laangfristeg Finanzéierung zur Verfügung, andeems en op substantiell privat an ëffentlech Mëttele fir d'Ënnerstëtzung vun enger nohalteger Wirtschaft zeréckgräift. En hëlleft, zousätzlech Investitiounen ze generéieren, déi mat de Prioritéite vun den EU-Politicken, wéi dem Europäesche Green Deal, der digitaler Transitioun an der Ënnerstëtzung vu klengen a mëttelgrousse Betriber, kompatibel sinn. InvestEU bréngt all EU-Finanzinstrumenter ënner engem Daach zesummen a mécht d'Finanzéierung vun Investitiounsprojeten an Europa méi einfach, méi effizient a méi flexibel. De Programm besteet aus dräi Komponenten: dem InvestEU-Fong, den InvestEU-Advisory Hub an dem InvestEU-Portal. Den InvestEU-Fong gëtt iwwer Finanzpartner ëmgesat, déi mat der EU-Budgetsgarantie vu 26,2 Milliarden Euro a Projeten investéieren. Dës Garantie erhéicht hir Risikokapazitéit a mobiliséiert doduerch op d'mannst 372 Milliarden Euro un zousätzlechen Investitiounen.

Artec 3D mat Sëtz zu Lëtzebuerg entwéckelt a produzéiert Héichpräzisiouns-3D-Scanneren an intelligent 3D-Software fir eng séier a präzis Datenerfaassung. Dat erlaabt et de Clienten, séier an einfach en 3D-Modell vun all reellem Géigestand ze erstellen an dësen dann auserneenzehuelen, ze inspizéieren oder op Ufro ze reproduzéieren. D'Produiten a Servicer vun Artec 3D kënnen a ville Secteuren agesat ginn, wéi zum Beispill am Ingenieurswiesen, an der Medezin, am Design, an der Metrologie, an de computergeneréierte Biller, an der Erhalung vum Ierwen, an der Sécherheetstechnologie a villem méi.