>@LSHP
© LSHP
  • Eurohpálaš investerenbáŋku (European Investment Bank, EIB) lea mieđihan 72 miljovnna euro loana Lappi buohccedikšunbiirii guovddášbuohcceviesu ovttastahttin- ja viiddidanbargui Roavvenjárggas.
  • Ruhtadeapmi geavahuvvo dálá doaibmasajiid moderniseremii, ođđa psykiátralaš buohcceviesu huksemii sihke guovddášbuohcceviesu viiddideapmái.

Eurohpálaš investerenbáŋku lea mieđihan 72 miljovnna euro loana Lappi buohccedikšunbiirii Davvi-Suomas. LBDB jođiha guovddášbuohcceviesu doaimmaid Roavvenjárggas ja geavaha ruhtadeami doaibmasajiid vuđolaš buorideapmái ja maiddái ođđa psykiátralaš buohcceviesu huksemii. Guovddášbuohcceviesu álgoálgosaš doaibmasajit diŋgojuvvojedje jagi 1988, ja psykiátralaš buohcceviessu lea ovddit, menddo stuorra tuberkulosaklinihkas 30 kilomehtera geahčen. Dálá viessodárbbut, beaktilis bargojohtu, lágalaš gáibádusat ja ođđaáigásaš hábmenstandárdat leat gáibidan investerema ja dili buorideami sihke buhcciid ja bargoveaga ektui.

EIB:a várrepresideanta Thomas Östros lohká: “Buohcceviesuid doarjun lea leamaš EIB:a prioritehtan juo ovdal dálá dearvvasvuođafuolahuskriisa, ja dan boađusin mieđihit loana Lappi guovddášbuohccevissui. Buhcciid loaktin ja álkes johtu sihke energiijagolaheami ja bargobirrasa beaktilvuohta sáhttet ollašuvvat oktanaga, dego dán prošeavttas duođaštuvvo, ja mii doarjut dan buriin mielain.”

Geavatlaččat dán EIB:a doarjun prošektii gullá dálá guovddášbuohcceviesu viiddideapmi ođđa osiin, gosa šaddet ođđaáigásaš diagnoseren- ja dikšunlanjat. Maiddái buohcceviesu intensiivaossodat ja njeallje dálá čuohpadanlanja ođasmahttojuvvojit, vai buohcceviessu bastá buorebut vástidit sihke dálá COVID-19-pandemiija ja vejolaš boahtteáiggi hástalusaide. Ruhtadeapmi geavahuvvo maiddái dálá ođđa psykiátralaš buohcceviesu huksemii buohcceviesu váldoviesu oktavuhtii sihke máŋggagearddat biilavissui, mii buorida jođu Suoma bieđggoássanguovlluin.

Duogášdieđut:

Eurohpálaš investerenbáŋku lea Eurohpá uniovnna guhkesáigeloatnainstitušuvdna, man EU:a lahttoriikkat oamastit. Dat fállá guhkesáigge ruhtadeami dorvvolaš investeremii EU:a politihkkamihttomeriid ovddideami várás. Jagi 1994 vuosttas doaimmaid maŋŋá báŋku lea fállan suopmelaš prošeavttaide loatnan badjelaš 24.7 miljárda euro. EIB loneha ruđa kapitálamárkaniin ja lone dan prošeavttaide mat dorjot EU:a mihttomeriid, ja sullii 90% buot loanain mieđihuvvojit Eurohpá uniovnna siste.

Lappi buohccedikšunbiire (Lapin Sairaanhoitopiiri, LSHP) lea gielddaovttastupmi man oamastit 15 gieldda. LSHP:s lea ovddasvástádus guovllu dearvvasvuođafuolahusa bálvalusaid fállamis ovttas vuođđodearvvasvuođafuolahusain ja sosiálabálvalusaiguin. Resursat plánejuvvojit ássiid dearvvasvuođadivššu dárbbuid ja buori bálvalusa prinsihpaid mielde, vai bohtosat lea ekonomalaččat suvdilat ja alla kvalitehtat.